Si kanhi Land Transportation Franchising and Regulatory Board (LTFRB) senior executive assistant Jeffrey Tumbado nibakwi sa mga pasangil sa kurapsyon nga iyang gibato batok sa iyang kanhi hepe, si suspendido LTFRB chairman Teofilo Guadiz III, ingon man sa mga opisyal sa Department of Transportation (DOTr) ug Office of the Presidente.

Sa iyang affidavit of recantation nga giisyu niadtong Miyerkules, Oktubre 11, 2023, si Tumbado nangayo og pasaylo sa iyang mga pamahayag, partikular na sa grease money nga giingong nadawat ni Guadiz gikan sa transport groups alang sa pagproseso sa ilang mga hangyo, sama sa pagbag-o sa rota, pag-isyu og espesyal nga permit ug pag-prioritize sa mga papeles sa prangkisa.

“After a careful reflection and deliberation, it is my honest desire to reiterate whatever allegations may have been said during the press conference on October 9, 2023 where the public declaration was made were all unintentional and misguided,” matod niya.

“All of the things said were borne out of impulse, irrational thinking, misjudgment, poor decision making and were encouraged by some individuals to make the statement which may have added to my confusion and affected my better judgment,” dugang niya.

Si Tumbado niingon nga dili niya tuyo ang “pagdaot sa integridad ug dungog ni bisan kinsa.”

Apan matod niya nga iyang gibarugan ang isyo nga adunay mga problema sulod sa LTFRB nga nagkinahanglan og dinaliang imbestigasyon aron masilutan ang mga responsable.

Matod ni Tumbado atol sa press conference niadtong Oktubre 9, nga gipasiugdahan sa transport group nga Manibela, pinangulohan sa chairperson niini nga si Mar Valbuena, nagtuo siya nga ang payola moabot sa DOTr ug sa MalacaƱang kay dili molihok si Guadiz kon walay mando gikan sa mga labaw.

Matod niya nga duha usab ka kongresista ang nakabenepisyo sa ilegal nga koleksyon.

Pipila ka oras human nihimo si Tumbado sa mga pasangil, si Presidente Ferdinand Marcos Jr. nimando sa pagsuspenso kang Guadiz, samtang si DOTr Secretary Jaime Bautista niisyu kaniya og notice aron mopasabot.

Sila si Guadiz ug Bautista parehong mihimakak sa pamasangil ni Tumbado.

Sa gipahigayong press conference sa nagkadaiyang transport groups niadtong Huwebes, Oktubre 12, si Tumbado gipasanginlan nga maoy nangayo kanila og kuwarta.

Si Benhur Menor, sakop sa transport group nga SV3, niingon nga si Tumbado nakadawat og P300,000 gikan kanila alang sa pagproseso sa ilang prangkisa.

Matod niya nga ang pagbayad gihimo sa tulo ka hugna, nga nahitabo atubangan sa opisina ni Guadiz.

Si Zaldy Ping-Ay sa grupong Stop and Go niingon nga si Tumbado nangayo sab og kuwarta kaniya aron makig-estorya kang Guadiz.

Si Tumbado niingon nga iyang pasakaan og kasong libelo ang mga mopasangil kaniya og kurapsyon. (TPM sa SunStar Philippines)


Source: Sun.Star Superbalita (https://www.sunstar.com.ph/article/1975456/superbalita-cebu/balita/tumbado-mibakwi-sa-mga-pasangil)