PATAY ang gituohang miyembro sa 'akyat-bahay' gang human nga naniyutralisa sa mga pulis sa Mandug Police Station kay giingong misukol dihang naaktuhan nga misaka sa balay sa Phase 4, Deca Homes, Indangan, Davao City.

Pasado alas 3 kagahapon sa kaadlawon, Oktubre 12, 2023, nag-patrolya ang mga sakop sa Mandug police sa nasampit nga dapit.

Giingon nga ilang naaktuhan ang nasampit nga lalaki kinsa anaa sa pangedaron nga 25-30-anyos nga miaksiyon na og katkat sa pader sa usa ka balay.

Dihang gisita sa mga pulis, mibunlot na hinuon kini og pusil dayon gipamusil ang mga pulis nga sakay sa mobile patrol.

Tungod sa hitabo, giniyutralisa kini sa mga pulis, ug gidali pagdala sa Southern Philippines Medical Center (SPMC), apan nakabsan gihapon sa kinabuhi.

Nakuha sa posisyon sa napatay ang usa ka .22 magnum revolver walay serial number nga dunay tulo ka mga buhing bala ug duha pa ka mga buhing bala sa .22 caliber pistol.

Sukad sa pagsuwat ning balita kagahapon sa hapon, wala pa nakahatag og progress report ang kapulisan sa Mandug PNP sa pag-ila sa napatay nga miyembro sa 'akyat-bahay' gang.


Source: Sun.Star Superbalita (https://www.sunstar.com.ph/article/1975430/superbalita-davao/balita/sakop-sa-akyat-bahay-napatay)