GIDEKLARAR ni Presidente Ferdinand Marcos Jr. ang Oktubre 30, 2023 isip espesyal nga adlaw nga walay trabaho sa tibuok nasud.

Sa Proclamation No. 359, gideklarar ni Marcos nga ang Lunes, Oktubre 30 usa ka special non-working holiday alang sa 2023 Barangay and Sangguniang Kabataan Elections (BSKE).

Si Marcos nipadayag nga tumong niini aron mahatagan og kahigayonan ang mga Pilipino nga makabotar.

“It is imperative that the people be given the full opportunity to participate in the said elections and exercise their right of suffrage,” ni Marcos sa proklamasyon.

Ang proklamasyon gipirmahan ni Executive Secretary to the President Lucas P. Bersamin niadtong Lunes, Oktubre 9.

Ang Korte Suprema nihatag og pagtugot sa Commission on Elections (Comelec) sa pagpadayon sa pagpahigayon sa Barangay and SK Elections nga gitakda karong Oktubre 30.

Samtang, ang fresh graduate nga si Enah Fleur Mamac misaysay sa SunStar Davao sa phone interview niadtong Miyerkules sa hapon, Oktubre 11, nga usa ka pribilehiyo nga ang Oktubre 30 gideklarar nga non-working holiday.

“It's a good thing and a privilege mainly because matagaan ang tanan og chance to really practice their rights, especially for people like me who reside somewhere far away from registered voting places,” ingon ni Mamac.

Dugang pa niya nga ang mga estudyante nga nagtungha sa kalungsuran mahimong mamauli sa ilang mga probinsiya ug mobotar sa mga kandidato nga ilang gituohan nga epektibong makaserbisyo sa ilang barangay.

Sa samang higayon, si Clifford James Danduan, usa ka tinun-an sa kolehiyo ug usa ka working student nisaysay sa SunStar Davao, Miyerkules sa hapon, Oktubre 11, nga hustong desisyon nga ideklarar ang Oktubre 30 isip special non-working holiday aron makahatag kini og dalan sa mga nagtrabaho aron makabotar.

“I have witnessed different outcries and concerns from my fellow citizens about the postponement, so with this proclamation, it will allow us to participate fully and freely in the election process,” ingon ni Danduan.

Subay sa calendar of activities sa BSKE Oktubre 19-28 ang campaign period, diin sa Oktubre 30, 2023 gikan alas 7 sa buntag hangtud alas 3 sa hapon ang Election Day.

Ug sa Nobyembre 29, 2023 ang last day sa pag-file sa Statements of Contribution and Expenditures (SOCE).

Dugang pahimangno sa opisyal ngadto sa mga magpapili karong umaabot nga eleksiyon labot sa 'premature campaigning' gumikan kay sa Oktubre 19 hangtud Oktubre 29 pa magsugod ang kampanya.

Sa 182 ka barangay sa Davao City naa kini 1,031,488 registered voters sa barangay level ug 285,986 alang sa Sangguniang Kabataan. 


Source: Sun.Star Superbalita (https://www.sunstar.com.ph/article/1975331/superbalita-davao/balita/oktubre-30-holiday-gihangop)