Naghuwat sa social pension program sa Department of Social Welfare anf Development (DSWD) ang 55,000 ka senior citizens sa Central Visayas.

Ang maong mga senior citizen naghuwat nga adunay mabakante nga slot aron malakip sa programa.

Si Daisy Lor, social pension focal head sa DSWD 7, nagkanayon nga ang indigent nga mga senior citizen nga na-enrolled sa programa makadawat og monthly pension nga P500.

Ang maong kantidad gikatakda nga madawat kaduha sa usa ka tuig o matag semester.

Giklaro usab sa buhatan nga ang mga senior citizen lang nga indigents ug wala magdawatan og bisan unsang pension gikan sa ubang institusyon sama sa Social Security System (SSS), Government Service Insurance System (GSIS), ug kadtong walay trabaho, lakip na sa wala makadawat og sustento sa ilang mga anak.

Gipasabot sa buhatan nga sanglit limitado ang pundo niini, dili tanan nga mga senior citizen ang makadawat ug maka-enroll sa programa.

Ang mga lokal nga kagamhanan una na nga gitahasan sa pag identify sa mga indigent nga senior citizen nga takos nga ma-enroll sa programa.

“Dili man gyud tanan ma-enroll nato sa social pension kay limited raman ang slot ini, mao nga atong gitahasan ang mga LGU sa pag-identify sa mga deserving nga senior citizens,” matod ni Lor.

Sa kasamtangan ang Central Visayas adunay 299,737 ka mga social pensioner.

Nanghinaot ang buhatan nga buksan sa kaulohan ang dugang slots aron maakomodar ang uban pang nagkinahanglan. (ANV)


Source: Sun.Star Superbalita (https://www.sunstar.com.ph/article/1975460/superbalita-cebu/balita/55k-ka-seniors-naghuwat-og-slot-sa-dswd-pension)