Moabot sa 332 ka police personnel ang ipadala sa Police Regional Office (PRO 7) sa Negros Oriental ning nagkaduol na ang Barangay and Sanguniang Kabataan Elections (BSKE) sa Oktubre 30, 2023.

Matod ni Police Colonel Noel Flores, deputy regional director for operations sa PRO-7, nga gawas sa mga polis, nisaad usab ang armadong kusog sa Pilipinas nga mopadala og 1,700 ka mga sundalo sa maong lalawigan, lakip na ang Philippine Coast Guard.

Kini aron masiguro ang kaluwasan sa mga lumolopyo sa maong probinsya ug makabotar sa ilang gitinguha nga mangulo sa ilang tagsa-tagsa ka barangay nga walay naghulga sa ilang siguridad.

Hinuon, dugang ni Flores nga sukad gipabahaan og daghang mga polis ug mga sundalo ang maong probinsya human sa nahitabong duguon nga pagpamusil sa lungsod sa Pamplona nga mikalas sa kinabuhi ni Governor Roel Degamo ug miangin pa og siyam ka kinabuhi, miubos na ang mga krimen. (AYB)


Source: Sun.Star Superbalita (https://www.sunstar.com.ph/article/1975461/superbalita-cebu/balita/332-ka-polis-sa-pro-7-moabag-sa-negrosor)