ANG dugay nga paggamit sa gadgets mahimong hinungdan sa seizure sa kabataan.

Kini maoy giingon ni Dr. Gea Shanine Sedayao sa Southern Philippines Medical Center (SPMC) Department of Pediatrics atol sa Kapehan sa Dabaw, Lunes sa buntag, Septyembre 18, sa SM City Davao.

Matod ni Sedayao nga posible sab nga hinungdan sa seizure ang pagkidlap-kidlap sa suga dungan sa sobra nga pagamit sa mga gadget.

Apan giklaro ni Sedayao nga ila pa kining gitun-an kon aduna bay kalambigitan ang pagamit sa gadget ngadto sa pag seizure.

Dugang ni Sedayao nga bisan mga masuso ug batan-on nga edad og 18-anyos apektado sa 'seizures'.

Sa pediatric emergency room, nakadawat sila og duha hangtud tulo ka mga bata tungod sa pagkurog tungod sa impeksiyon o complex febrile seizures.

Samtang sa outpatient department (OPD), nakadawat ang pediatrics division og napulo ka mga pasyente nga nagpatol matag duha ka adlaw.

Kon itandi sa niaging tuig, gikataho nga nisaka ang kaso sa patol ug pagkurog.

Hinungdan matud niini, posible tungod sa Covid-19 pandemic, kay daghan nga mga pasyente wala makahimo sa ilang regular nga checkups.

Samtang, ang gilay-on sa mga ospital lakip sa hinungdan kon nganong ang ihap sa mga kaso mas taas itandi sa miaging tuig tungod kay mga pasyente gikan sa hilit nga mga lugar sama sa Surigao ug Malita.

Gikataho nga modagsa pa sila sa SPMC aron magpatambal uban ang espesyalidad sa neurological pediatrics nga wala sa mga probinsiya, busa kinahanglan silang mobiyahe padulong SPMC aron lang nga magpa-checkup.

Gihisgutan ni Sedayao nga dunay daghang rason nga maoy hinungdan sa pagkurog, mahimong 'metabolic, tumor, poison, or other metabolic disorders' ug aron nga mahitabo ang pagkurog, kinahanglan nga dunay imbalanse sa Gamma-aminobutyric acid (gabba) receptors sa lawas sa tawo.

Gipasabot ni Sedayao nga ang metabolic imbalance mao ang 'disparity in electrolytes' sama sa sodium, potassium, ug calcium. 'Electrolyte disturbances such as hypoglycemia which is low blood sugar may trigger a, seizure particularly in babies'.

Gitumbok ni Sedayao nga ang kakuwang sa nutrisyon, pagkaon og junk foods maka-triger og 'seizures' ilabi na kon makaapekto sa neurotransmitters apan ang SPMC nagpromotar og pagkaon og mga prutas, gulay, ug pag-inom og tubig.

Nipahimangnu ang SPMC ngadto sa publiko sa status epilepticus nga mao ang seizure nga mahitabo og kapin 30 minutos.

Gikinahanglan nga dalion kini sa pagdala sa pinakaduol nga ospital tungod kay 'fatal type' kini nga patol nga posibleng mamatay.

Ang ospital padayon nga nag-adbokasiya sa immunization alang sa kabataan tungod atol sa pandemic daghang mga kabataan wala makadawat sa ilang dose sa medikasyon nga nihatud ngadto sa pagtaas sa mga kaso sa mga sakit nga mapugngan unta sa bakuna.

Mga pasyente nga dunay simtomas sa seizures o na-diagnosed nga dunay patol duol sa Neuro Clinic ubos sa OPD sa Jica building sa SPMC. (RGP )


Source: Sun.Star Superbalita (https://www.sunstar.com.ph/article/1973078/superbalita-davao/balita/sobrang-gamit-sa-gadgets-maka-seizure)