GOOD news alang sa mga benepisyaro gumikan kay nagpadayon ang Department of Social Welfare and Development (DSWD) Field Office - Davao Region sa pagpang-apud-apod P15,000 nga one-time cash assistance ubos sa programang Sustainable Livelihood Program (SLP) - Economic Relief Subsidy (ERS) alang sa mga apektadong small and micro rice retailers lukop rehiyon.

Gisugdan ang pag-apud-apod niadtong Septyembre 13, 2023 sa matag munisipalidad ning rehiyon.

Matod sa DSWD-Davao, nga dili mabalaka ang wala naka-claim gumikan kay adunay mga paagi sa pagkuha niini.

Miabot na sa 182 ka mga benepisyaryo ang gi-endorso sa Department of Trade and Industry (DTI) Davao sa buhatan sa DSWD nga kwalipikado nga makadawat sa maong hinabang.

Gipangunahan ni DSWD Promotive Services Chief Elizabeth T. Degorio ang pagdunol sa maong ayuda didto sa Almendras Gym, siyudad sa Davao.

Nagpahigayon usab sa susamang aktibidad ang ahensiya sa mga munisipyo sa Probinsiya sa Davao del Norte, Davao de Oro, ug sa Davao Oriental.

Ang Cash Assistance alang sa mga micro rice retailers usa ka programa ubos sa SLP, subay sa mando ni Presidente Ferdinand Marcos Jr., aron matabangan ang mga gagmay’ng rice retailers nga labing apektado ang kapital tungod sa implementasyon sa nationwide rice price ceiling.

Magpadayon ang pagpanghatag sa uban pang probinsiya ug munisipyo sa karong buwana. (JPC/DSWD-11)


Source: Sun.Star Superbalita (https://www.sunstar.com.ph/article/1972973/superbalita-davao/balita/payout-sa-micro-rice-subsidy-padayon)