GIPANGSUGDAN na niadtong Miyerkules, Septyembre 13, 2023, ang pagpang-apud-apod sa fuel subsidy ngadto sa mga operator sa mga pampublikong sakyanan sa nasud.

Sa Davao City, perteng lipaya ni Enrique Hormechulles, 61-anyos, taga Barangay Ubalde, R. Castillo, Agdao District, Davao City dihang iyang nasayran nga madawat na ang ayuda.

Sumala sa nahisgutan nga dako na kaayo kining tabang ngadto sa mga operators sanglit matag karon ug unya nagkamahal ang presyo sa lana.

“Dako na kaayo ning tabang, walay kabutangan sa akong kalipay, sayod ko nga dili lang ako, apan tanang operator malipay gayod,” ingon ni Hormechulles.

Nanawagan sab sa maong operator nga unta mapadayon kini nga programa ug dili sa sinugdanan lamang.

“Mapadayon unta ni, basin karon ra pud ni, ipadayon gyod kay nindot nga programa,” sumpay sa maong operator.

Gitin-aw sa Land Transportation Franchising and Regulatory Board (LTFRB) nga ang maong fuel subsidy alang sa mga operator sa mga pampublikong sakyanan.

Ang subsidy tabang sa gobyerno sa mga PUV operators taliwala sa way-puas nga pagsaka ug naug sa presyo sa produktong petrolyo.

Mahatagan o makadawat sa ayuda ang mga operator sa PUJs, Filcabs, UV express, minibuses, public utility bus o PUB, shuttle services, taxis, tourist transport services, school transport service, transportation network vehicle services, delivery services, ug tricycle.

Mga kuwalipikadong operator sa modern PUJs ug UV Express sa programa makadawat og P10,000 subsidy.

Mokantidad sab sa P6,500 ang ihatag kada operator sa mga pampublikong sakyanan moderno man o dili.

Duna say P1,200 nga subsidy ang delivery service rider, nga kuwalipikado sa programa ug P1,000 sa mga drayber og tricycle.


Source: Sun.Star Superbalita (https://www.sunstar.com.ph/article/1972747/superbalita-davao/balita/fuel-subsidy-sugod-nag-arya)