Usa sa unom nga sakop sa New People’s Army (NPA) nga nakalas sa engkwentro sa lalawigan sa Bohol niadtong Septiyembre 7, 2023, usa ka Indigenous People (IP) organizer sa Mindanao nga mao si Kerlan Fanagel, chairperson sa Pasakaday Salugpungan Kalimudan kun (Pasaka) nga usa kini ka hugpong sa mga lumad sa Southern Mindanao region.

Sa nakuha nga kasayuran sa Visayas Command (Viscom) nga si Fanagel giingong kanhi naila nga ‘Rogelio Jarillo’ nga taga lungsod sa Minglanilla, lalawigan sa Sugbo base sa nakuha identification sa iyang patayng lawas.

Apan sa gihimong pakisusi ug pagkonsulta sa Armadong Kusog sa Nasod ug sa kapulisan ngadto sa mga kanhi sakop sa NPA, nasuta ang ti­nuod nga bansagon nga mao si Kerlan Fanagel nga taga Barangay Poblacion, lungsod sa Malapasan, probinsya sa Sarangani.

Matod ni Army Lieutenant General Benedict Arevalo, commander sa Viscom, nagpamatuod lang kini sa pagpangilad nga gihimo sa mga komunistang NPA diin misulod na sila sa nagkadaiyang sector sa komunidad apil na niini ang IP.

“This is a clear manifestation of the deceptive tactics employed by the CPP-NPA. They infiltrate the different sectors in our community to include our Indigenous People, orga­nize them, and use them to go against the government”, sigun ni Arevalo.

Gawas sa iyang pagka pangu­lo sa maong hugpong sa mga IP, nahimo usab siya nga council member sa Katribu, usa ka nasudnong kahugpo­ngan nga gitawag nga Kalumaran Mindanao ug Sandugo nga nag-alyansa sa Moro ug IP nga organisasyon.

Sakop usab siya sa Regio­nal Urban Committee sa NPA Southern Mindanao Regional Command (SMRC) nga maoy responsabli sa pagtigom sa mga IP alang sa himuon nga protesta sa urban centers sa Mindanao ug Metro Manila.

Dugang ni Arevalo nga ang presensya ni Fanagel sa Bohol nagpamatuod lang sa assessment nga ang komunistang grupo nagtinguha gyud nga ilang mabalik ang suporta sa masa nga nawagtang kanila human gihingusgan sa kagamhanan ang local task force to end local communist armed conflict.

Niadtong May 12, 2015, si Kerlan Fanagel uban sa 14 ka leaders sa nagkalainlaing progresibong hugpong, gikiha kinig kasong kidnapping ug serious illegal detention lakip na human trafficking sa Crimi­nal Investigation and Detection Group human gidala ang gatusan ka mga indigenous people gikan sa Talaingod, Davao del Norte paingon sa Davao City.

Ang lawas ni Fanagel gikuha na sa igsuong lalake niini nga si Kernie Fanagel niadtong Septembre 12, 2023. 


Source: Sun.Star Superbalita (https://www.sunstar.com.ph/article/1972963/superbalita-cebu/balita/1-sa-6-ka-npa-napatay-sa-bohol-ip-organizer)