Tulo ka babaye patay human ang ilang gisakyang motorsiklo nibangga sa lamp post sa Barangay Santander, lungsod sa Tudela sa isla sa Camotes, amihanan sa lalawigan sa Sugbo, alas 5:15 sa hapon sa Huwebes, Marso 6, 2023.

Ang mga biktima mao sila si Gemarie Arguedo Gilbuena, hingkod ang panuigon, minyo, ug taga Barangay General, Tudela; Maricris Magallanes Diocampo, hingkod, dalaga, ug taga Barangay Villahermosa, Tudela; ug Anna Vie Yesca Villar, hingkod, dalaga, ug taga Brgy. Villahermosa.

Ang tulo pulos kawani sa Kalahi-Municipal Social Welfare and Development Office (Kalahi-MSWDO) gideklarar nga parehong dead-on-arrival (DOA) sa Camotes District Hospital sa lungsod sa San Francisco, Camotes.

Si Police Senior Master Sgt. Glen C. Abapo, imbestigador sa Tudela Police Station nga nahinabi sa Superbalita Cebu, nagkanayon nga ang mga biktima sakay sa motorsiklo nga gimaniho ni Gilbuena.

Matod ni Abapo, base sa mga saksi, kusog nga nakapadagan si Gilbuena sa gimaneho nga motorsiklo ug angkas niya ang duha ka mga kauban sa trabaho.

Sa pagdulhog sa kurbadang karsada nga dalan, dason ni Abapo, wala na nakontrolar ni Gilbuena ang manobela sa motorsiklo hinungdan nga nabangga sila sa barangay lamp post.

Tungod sa ka kusog sa impact, nakaangkon og grabing kadaot sa ilang mga ulo ug kalawasan ang mga biktima.

Wala sab mahitsura ang kadaut sa ilang gisakyang motorsiklo.

“Nagdali daw ni sila aron makapanso sa ilang pag-uli sa trabaho. Pero kusog nga nagdulhog wala na mokupot ang brake. Naratol ang driver, nabangga sa lamp post sa barangay,” sumala ni Abapo.

Gipadayag ni Abapo nga kabisado sa biktima ang karsada apan wala mosaler human nawad-an og brake ang ilang motorsiklo.

Ang mga biktima gikan sa usa ka barangay sa lungsod diin dunay gisusi nga trabaho sa karsada. / GPL

Source: Sun.Star Superbalita (https://www.sunstar.com.ph/article/1956394/superbalita-cebu/balita/3-patay-sa-aksidente)