Gipahinumdoman sa Commission on Elections (Comelec) Central Visayas ang publiko, ilabina ang dili rehistrado nga mga Filipino nga 15 anyos pataas, sa pagbisita sa labing duol nga buhatan sa Comelec o satellite offices sa dili pa matapos ang voter’s registration karong buwana.

Si Comelec 7 Acting Director Lionel Marco Castillano niingon nga ang ahensiya nagdawatan gihapon og mga aplikasyon alang sa bag-ong voters’ registration, pagbalhin sa polling precinct ngadto sa laing presinto, correction of entries, ug reactivation sa voter’s registration.

Ang rehistrasyon sa mga botante matapos sa Enero 31, 2023.

Si Castillano niingon nga ang voter’s registration kabahin sa pagpangandam sa ahensya alang sa umaabot nga Barangay ug SK elections, nga ipahigayon karong Oktubre 30, 2023.

“Please visit the Comelec FB pages sa inyong lugar para makahibalo mo kon asa karon panahona ang Comelec nga nag-rehistro kay naa man ta’y mga offsite ug mall registration,” matud ni Castillano sa SunStar Cebu sa Lunes, Enero 23, 2023.

Mahimo usab nga i-download sa mga aplikante nga libre ang registration forms gikan sa links nga gihatag sa Comelec Facebook pages, samtang adunay available nga forms sa ilang mga opisina ug off-site registration venue. (EHP)


Source: Sun.Star Superbalita (https://www.sunstar.com.ph/article/1951606/superbalita-cebu/balita/deadline-sa-rehistrasyon-sa-comelec-sa-enero-31-na)