SAMA sa Davao City ug sa ubang bahin sa Davao Region, gipahalipayan ug pahalipayan pa sa Department of Social Welfare and Development (DSWD) ang mga edaran karong panahon sa Pasko.

Didto sa Soccsksargen region, ang mga edaran sa Pikit, Cotabato miisip nga sayo nga grasya sa pasko sa dihang nakadawat sila og P1,500 Social Pension gikan sa DSWD-Soccsksargen nga gipangulohan ni Regional Director Loreto Cabaya Jr.

Ika-upat nga kuwarter na sa tuig, mao nga sa wala pa ang Disyembre, ang DSWD-Soccsksargen nag-apud-apod na sa SocPen sa mga senior citizens.

Sa lungsod sa Pikit, mikabat sa 8,142 ka benepisyaryo ang nadawat gikan sa 42 ka mga barangay sa maong lungsod.

Ang ubang mga benepisyaryo nga dili na makabiya sa ilang mga panimalay tungod sa sakit o katigulangon personal nga gibisita sa mga kawani sa Social Pension Program aron lang makuha nila ang pensiyon nga angay kanila.

Ang ubang mga pension nga wala mabayri gibahin usab sa third quarter sa fourth quarter payout.

Gipaabot nga gamiton sa mga senior citizens ang pensiyon nga ilang nadawat aron ipalit og tambal, gatas ug bisan unsang panginahanglanon.

Sa Davao City ug sa ubang bahin ning rehiyon, padayon ang pagpang-apud apod sa ayuda. (Uban sa taho ni Jeepy P. Compio)


Source: Sun.Star Superbalita (https://www.sunstar.com.ph/article/1946942/superbalita-davao/balita/senior-citizens-maka-payout-karong-pasko)