Usa ka cashier sa usa ka mall sa Barangay Lamac, lungsod sa Consolacion gipusasan human nasakpan nga wala gipanso ang gi-shopping sa kustomer, alas 12:00 sa udto sa Martes, Nobiyembre 22, 2022.

Gipangpusasan sila si Jeden Molejon Cabang, 20, dalaga, taga Purok Ipil-ipil, Tata-an, Barangay Estaca, lungsod sa Compostela ug ang kustomer nga iyang silingan nga si Ma. Amina Danlag Benting, 27, dalaga.

Si Police Staff Sgt. Arnold Rusiana sa Consolacion Police Station nga nahinabi sa Superbalita Cebu niingon nga ang mga suspek nadakpan sa mga gwardiya sa mall.

Sumala pa niini nga si Benting nag-shopping sa mall ug ubay-ubay nga nagkadaiyang items ang gidala.

Si Benting nidiretso sa cashier nga si Cabang.

Giplastada niya ang mga gikumpra dali sab nga gipunit sa cashier ug gipangsulod tanan sa sudlanan.

Nabantayan sa gwardiya nga kadudahan ang lihok sa duha.

Tungod niini, daling gisita ang duha ug gi-inventory ang mga gikumpra.

Nasuta nga ang mga gikumpra mobalor tanan og P6,689.57 pero ang gipansohan niini sa resibo mobalor lang og P127.65 hinungdan nga gipusasan silang duha.

Sa imbestigasyon, nahibaw-an nga silingan ang duha ug giingong nagkunsabo sa pagpangawat.

“Katulo na diay nila ni buhata kunohay mangumpra, pero dili insakto pagpanso sa resibo,” matud ni Rusiana.

Dugang niya nga gipanid-an sa gwardiya ang cashier hangtud nga ilang nasuta ang modus niini uban kang Benting.

Source: Sun.Star Superbalita (https://www.sunstar.com.ph/article/1946866/superbalita-cebu/balita/cashier-kustomer-sa-mall-gipusasan)