Dili mominus 250 ka mga balay ang naugdaw ug kapin sa 600 ka mga pamilya ang apektado sa sunog sa Sityo Paradise, Barangay Looc, Dakbayan sa Mandaue, alas 11:46 sa gabii sa Martes, Nobiyembre 22, 2022.

Si SFO1 Danny Zamora, fire investigator sa Mandaue City Fire Office (MCFO), nibana-bana sa danyos nga P1.5 milyunes sa sunog nga nilungtad og dul-an sa tulo ka oras.

Matud ni Zamora, tungod sa gidagkutan nga katol aron pag-abog sa lamok maoy hinungdan sa sunog, sumala sa ilang pasiunang imbestigasyon.

Apan si Reynaldo Devilleres, 58, kawani sa Mandaue City Hall diin nasubay nga didto nagsugod ang kayo sa iyang lawak sa ikaduhang andana, nisaysay sa SunStar Cebu nga posible nga lampara nga nakalimtan niya sa pagpalong ug iyang nasikaran ang sinugdanan sa kayo.

Apan, dugang nasayran sa mga bombero, hubog si Devilleres dihang natulog.

Dugang ni Zamora, usa ka saksi nagkanayon nga nakahinumdom siya nga si Devilleres nidagkot og katol aron pangpawala sa lamok sa dayong katulog.

Si Devilleres niingon nga nakamata na lang siya tungod sa sininggitay sa mga tawo sa pagdako sa kayo ug sa iyang paningkamot nga makalingkawas, nakaangkon siya og second degree burns.

Si Zamora nagkanayon nga pag-abot sa mga bombero nga ningresponde, ang sunog gisaka dayon sa ikatulong alarma sa alas 11:55 sa gabii ug gisaka sa ikaupat nga alarma sa alas 12:02 sa kaadawon tungod sa kadako na sa kayo nga paspas nga nikatay sa mga balay nga kadaghanan ginama sa light materials.

Subay sa mandato sa Bureau of Fire Protection (BFP), ang ilang tanang buhatan motubag kon madeklarar sa naasoy nga ang-ang o status ang sunog.

Human sa pagsaka sa ikaupat nga alarma, ang mga bombero gikan sa Dakbayan sa Sugbo, Lapu-lapu, Dakbayan sa Talisay, Lungsod sa Minglanilla ug Dakbayan sa Naga ningresponde.

Lakip sa amihanang bahin sa Sugbo, ang mga firetruck gikan sa Lungsod sa Consolacion, Liloan, Compostela ug Dakbayan sa Danao nangabot.

Ang sunog sa Sityo Paradise hingpit nga gideklarar nga napalong sa alas 3:00 sa kaadlawon sa Miyerkules, Nobiyembre 23, 2022.

Gawas kang Devilleres, duna pay laing duha ka mga naangol, usa ka bombero ug sibilyan nga si Alejandro Cerena, kinsa nakaangkon og second degree burns.

Dugang ni Zamora, si Devilleres naa sa kustodiya sa kapulisan sa Opao Police Station sa Mandaue City Police Office (MCPO) isip proteksyon human daghan ang nangasuko kaniya samtang nagpaabot sa tukmang kaso nga ipasaka batok kaniya.

Samtang, subling gihimakak niini ang pasangil nga gituyo niya sa pagsunog ang iyang balay.

“Dili to tinuyo. Accidental gyud to, mao nay tinuod. Dugay na baya ko nagpuyo diha, nganong ako man gyung tuyoon? Kadako nakong priso ana og ako nang buhaton. Aksidente gyud to kay nakainom baya ko. Ako tong napatiran o nasaghiran ba to,” matud niya, ug midugang nga ang gas lamp nahimutang layo sa iyang mga tiil kutob sa iyang nahinumdoman.

Matud ni Devilleres nga dili angay magdumot kaniya ang mga apektadong residente sanglit wala kini tuyoa.

“Daghan gyud kaayo og nadamay. Sure gyud nga nasuko sila nako pero dili man na tinuod. Wala man na nako tuyoa pagsunog. Accidental man na siya,” dugang niya.

Hinuon, nangayo og pasaylo si Devilleres sa tanang mga nasunogan.

PASALIG NI CORTES

Gipasalig ni Mandaue City Mayor Jonas Cortes sa mga nasunogan sa Sitio Paradise nga makabalik sila ug makapatukod sa ilang mga balay sa maong luna nga gipanag-iya sa Dakbayan.

Matod ni Cortes, mahimo silang mobalik sa lugar basta magtukod og balay apan kinahanglan maghuwat og go signal sa City Government sa paghimo niini.

“Kay ato naning bahin-bahinon unya dili mahimo nga mang-invite na sad ta’g laing mga pamilya para mopahimo hinuon,” matud sa mayor.

Dugang ni Cortes nga uyon sila sa Sangguniang Panlungsod nga tugotan sila nga temporaryong makabalik sa lugar samtang nagpaabot sa housing project sa Kagamhanan sa Dakbayan.

Gihangyo hinuon ni Cortes ang kooperasyon sa mga nasunogan alang sa paspas nga validation tungod kay tumong sa kagamhanan nga mahatag ang hinabang pinansyal sulod sa tulo ka adlaw.

“Matag sunog di gyud ni kalikayan nga daghan kaayong badlungon, bisan dili apil sa sunog mao pa’y mag-una sa linya mangayo og hinabang,” matud ni Cortes, samtang gihangyo niya ang mga lumolupyo nga ipahibalo sa CSWS nga sila apil sa nasunogan.

Ang City Council gikatakdang mopahigayon og special session aron hisgutan ang financial assistance alang sa mga biktima.

Si Camillo Basaca, pangulo sa City Social Welfare Sevices (CSWS), niingon nga dunay 163 ka pamilya o 430 ka indibiduwal ang temporaryong gipahiluna sa Looc Gym samtang 438 ka pamilya o 1,861 ka indibiduwal sa City Central School.

Usa ka Task Force Balik-Tukod ang gilaraw nga umolon sa Kagamhanan sa Mandaue City.

Kini ang gipahibawo ni Association of Barangay Council (ABC) President Ernie Manatad atol sa interview kaniya sa Superbalita Cebu sa Miyerkules sa hapon, Nobiyembre 23, 2022.

Source: Sun.Star Superbalita (https://www.sunstar.com.ph/article/1946882/superbalita-cebu/balita/250-ka-balay-naugdaw)