GIPAKUSGAN gihapon sa lokal nga panggamhanan sa Davao City ang kampanya sa pagpahinumdom sa katawhan sa mga angay buhaton ug ubang mga health protocols batok Covid-19 bisan pa man nga gitugtan na nga boluntaryo na lang ang pagsul-ob og face mask sa mga bukas nga lugar kun open spaces.

Pinaagi sa Davao City Covid-19 Task Force (TF) mas miigmat pa sila diha sa pagpatuman sa mga protocols aron pahinumdoman ang katawhan dungan sa paggawas sa Executive Order No. 43 niadtong Miyerkules.

Bisan pa sa loose face mask protocol, ang sektor sa panglawas sa siyudad nagpabilin nga nagbantay, nagmentinar sa hugot nga kampanya niini sa minimum nga public health practices ug nagpadayon sa pagpahigayon og libreng testing sa gidudahang mga kaso ug close contacts.

Ang Davao City Covid-19 TF nagpakusog usab sa ilang kampanya sa pagbakuna sa mga lungsuranon.

Si Covid-19 TF Spokesperson Dr. Michelle Schlosser, atol sa COVID-19 Alert program nga gisibya sa Davao City Disaster Radio niadtong Miyerkules, miingon nga tungod sa accessibility sa bakuna, ang mga aktibong kaso sa Covid sa Davao kinahanglan nga mas ubos, samtang ang mga nangamatay tungod sa virus kinahanglan nga mas duol sa zero.

Sa datus, sa miaging semana Septyembre 11 hangtud 17, ang siyudad nag-report sa 436 nga mga bag-ong kaso, nga mas ubos kaysa 516 nga mga bag-ong kaso, tubag sa 15 porsiyento nga positivity rate nga gitaho sa miaging semana, Septyembre 4 hangtud 10.

Adunay kinatibuk-an nga 16 nga namatay tungod sa virus ang gitaho sa miaging semana; pito ang senior citizens samtang upat ang sakop sa 50-59 age bracket. Duha sab ka mga bata ang namatay, usa ubos sa edad nga 5-anyos, ang lain ubos sa 12-anyos, diin sa 16 nga namatay, siyam niini ang wala nabakunahan.

Ang wala pa makapabakuna, dunay weekend vaccinations sa Davao City People's Park, kauban ang Philippine Red Cross, diin magpabilin kining bukas sa tanan gikan sa katapusan ning bulan sa Septyembre alang sa nag-edad 5-anyos pataas.

Abli kini gikan sa alas 8 sa buntag hangtud sa alas 3 sa hapon. (Uban sa taho sa PIO)

Source: Sun.Star Superbalita (https://www.sunstar.com.ph/article/1941653/superbalita-davao/balita/vax-drive-mas-gihingudgan-pa-human-dili-pag-mask-gitugtan)