ISIP kabahin sa paningkamot sa SunStar Davao Publishing Inc, nga mas mapalapdan pa ang coverage ngadto sa mas daghang lugar sa Davao Region, ang SunStar Davao mipirma og memorandum of agreement (MOA) uban sa Davao Metro Shuttle Bus, Inc.

Madasigon nga mirepresenta sa paglagda si SunStar Davao OIC ug Business Manager Donna C. Cuyos samtang ang Davao Metro Shuttle Bus Inc. girepresentahan sa chief executive officer niini nga si Emerald Lim Uy.

Natigayon ang paglagdaay sa MOA kagahapon sa buntag, Septyembre 23, 2022, Biyernes didto sa Davao Metro Shuttle Bus, Incorporated head office sa Apokon Road, Tagum City, Davao del Norte.

Tungod niini, mas sayo kaayo nga maabot ang mantalaang SuperBalita Davao ug SunStar Davao sa mga dapit sa Davao Region pinaagi sa Davao Metro Shuttle Bus.

Usa sa mga nag-unang tumong sa SunStar Davao Publishing Inc nga gawas sa mga social media platforms niini, nga masayran sa katawhan ang mga nag-unang isyu, panghitabo sa palibot ug mga giya pinaagi sa mantalaan.

Samtang gikalipay sab og dako ni SunStar Davao Editor-in-Chief Reuel John Lumawag ang nahimong partnership sanglit usa kini ka pamaagi nga maabot ang mga lagyong dapit nga limitado sa pagsayod sa mga balita labi na kadtong mga dapit nga hinay ang koneksyon sa internet.

"SunStar Davao hopes to provide residents in the region with the latest stories of its communities. This partnership with Metro Shuttle Bus, Inc. will allow us to reach more people in Davao Region, particularly in areas where access to news can be limited."

Dugang ni Lumawag nga pinaagi sa pagpalapad, makahimo ang SunStar Davao sa paghikap pa sa mga kinabuhi ug paghatag og usa ka tingog sa daghang mga indibiduwal.

"We hope that by expanding our reach, we are able to touch lives and provide a voice to more individuals," panapos ni Lumawag.

Source: Sun.Star Superbalita (https://www.sunstar.com.ph/article/1941652/superbalita-davao/balita/sunstar-davao-davao-metro-shuttle-ka-partner-na)