PAGHUPAY sa kakabus maoy una sa gibutyag nga 12-point agenda sa administrasyon ni Mayor Sebastian "Baste" Duterte.

Kini gibutyag niadtong Huwebes atol sa panagtapok sa mga opisyal sa Davao City gikan sa executive ug legislative branches aron sa pag-umol sa Executive and Legislative Agenda (ELA) para sa 2023-2025 didto sa Arcadia Event Center, Quimpo Boulevard, siyudad sa Davao.

Si Davao City Acting Administrator Attorney Francis Mark Layog nga maoy nagpresentar sa 12-point priority agenda ni Mayor Duterte.

Ang 12 ka importanteng prayoridad mao ang paghupay sa kapobrehon; pagpalambo sa imprastraktura; malungtaron nga palibot; panglawas; edukasyon ug pagpalambo sa human resource development; agrikultura ug agribusiness; pagpalambo sa suporta sa negusyo ug industriya; pagplano sa transportasyon ug pagdumala sa trapiko; kalinaw ug kahusay; disaster risk reduction and mitigation; maayong pagdumala pinaagi sa bag-ong ICT; ug ang turismo ug kalamboan ug suporta nga mga serbisyo.

Kini nga mga programa gilakip sa diskusyon sa mga 200 ka representante sa mga buhatan sa kagamhanan sa dakbayan, sa Sangguniang Panlungsod, ug sa Department of the Interior and Local Government (DILG).

Si City Planning and Development Coordinator Engr. Ivan C. Cortez miingon nga ang ELA usa ka kinahanglanon sa DILG nga kinahanglang maporma sulod sa unang 100 ka adlaw sa matag bag-ong administrasyon.

Matud niya nga ang ELA maoy magtakda sa development direction sa city government, uban sa Sangguniang Panlungsod, sa mosunod nga tulo ka tuig.

Sama sa gituki ni DILG Davao Director Vicky Sarcena, ang ELA mao usab ang mahimong basehan sa Local Development Investment Plan (LDIP).

Ang LDIP maglangkob sa listahan sa mga proyekto ug programa sa ehekutibo ug lehislatibo alang sa pundo gikan sa tanan nga gigikanan.

Si Mayor Baste, sa iyang pakigpulong, niawhag sa executive ug legislative offices nga magtinabangay alang sa pagpatuman sa mga prayoridad nga proyekto ug programa nga ilhon ubos sa ELA. (City Information Office)

Source: Sun.Star Superbalita (https://www.sunstar.com.ph/article/1941654/superbalita-davao/balita/kakabus-apil-nga-tutukan-sa-12-point-priority-agenda-ni-mayor-baste)