BISAN tuod kon gipahibawo sa Land Transportation Franchising and Regulatory Board (LTFRB)-Davao Region nga ibalik ang Peak Hours Augmentation Bus Service (Phabs) tungod kay daghang pasahero naglisud og sakay, dunay pipila ka mga operators ug naghupot og prangkisa nibalibad nga mobiyahe tungod sa pagtaas sa presyo sa petrolyo.

Kini ang gitug-an ni Atty. Ernest Benz Davila, OIC-Regional Director sa LTFRB-Davao Region, sa pakighinabi sa uban ang SunStar Davao Miyerkules, Agosto 17, 2022.

Matud ni Davila nga dunay ubang mga drayber ang niundang na og pamasada ug nangita og laing panginabuhian ug nagbiyahe na lang isip delivery service.

Gibalik ang Phabs tungod sa daghang reklamo sa Dabawenyos sa kalisud sa pagsakay ning panahona ilabi na sa gabii ug panahon sa ulan tungod sa kanihit sa public utility vehicles (PUVs).

Ila nang gilauman nga dunay pagdaghan sa sumasakay tungod sa face-to-face classes apan nigamay sab ang nagbiyahian nga tradisyonal nga PUVs ug Filcabs niadtong 2022.

Sukad Hulyo, ang gidaghanon sa yunit nga nagbiyahian nga PUVs o Filcabs sa dakbayan niubos og 87.84 porsiyento, o 6,515 sa kinatibuk-ang yunit itandi sa rekord niadtong 2017 nga 7,417.

"We are encouraging our existing franchise holders to comply and operate. Right now, Davao Metro Shuttle has increased the number of buses for Calinan (karon 9) ug Catalunan Grande (karon 5). Hopefully, more buses/vehicles will be available next week," pagbana-bana ni Davila.

Hinuon, gitin-aw ni Davila nga kasamtangan silang nakig-koordinar uban sa nagkadaiyang bus operators alang sa Phabs.

"We are processing the Special Permit of LCI (Land Car Incorporated) for 3 units for Toril-Roxas Loop (Toril, Ulas, Bangkal, Matina, Quirino, Apo View Hotel, CM Recto, Roxas) and for the Golden Valley for 6 units for Lasang to Tionko Route (Lasang-Bunawan-Tibungco-Panacan-Sasa-Old Airport-SM Lanang, Victoria Plaza, Tionko)," butyag ni Davila.

Samtang gitug-an sa LTRFB nga ang rota alang sa Calinan padulong sa Roxas duna nay nagbiyahian nga siyam ka bus gikan sa Davao Metro Shuttle.

Apan wa pay operators nga nag-angkon sa rota alang sa Cabantian ug Mandug.

Sumala pa sa LTFRB nga alang sa air-conditioned nga mga bus, ang plite naa sa P13 alang sa unang lima ka kilometros (km) ug ang mosunod nga lima ka km dunay dugang nga P2.20, samtang ang non-air conditioned nga mga bus tag P11 alang sa unang lima ka km ug dunay dugang nga P1.80 matag km alang sa mosunod nga km human ang lima ka km. (KSD)

Source: Sun.Star Superbalita (https://www.sunstar.com.ph/article/1938173/superbalita-davao/balita/ubang-operators-sa-phabs-di-mobiyahe)