Subay sa nagpadayon nga krisis sa nasud, lakip sa naapektohan ang pangita sa nag-inusara nga sugar milling company sa probinsya sa Sugbo nga nahimutang sa amihanan.

Gikompirmar ni Medellin Mayor Benjun Mondigo. Jr. nga nakasinati og krisis ang Bogo-Medellin Milling Company, Inc. (Bomedco).

“Presently, dili maayo ang dagan sa Bomedco karon,” matod ni Mondigo Jr. kagahapon, Agust 17, 2022.

Matod ni Mondigo, ang 94-anyos nga milling company nga nahimutang sa Brgy. Luy-a padayon nga nakigkumbati subay sa mga hagit nga giatubang niini aron magpadayon ang operasyon.

“Ang uban planter ni opt to mill ila tubo sa Negros, ang pagsustain sa operation ang ilang dako nga (problema),” dugang niya.

Ang Bomedco unang nitaho nga pipila ka mga empleyado ang wala na patunghaa ilabi na sa mga administrative staff ug factory workers subay sa temporaryong pagsuspenso sa operasyon niini sukad sa Hulyo 15 hangtod sa Agusto 15. Base kini sa impormasyon sa Department of Social Welfare and Development in Central Visayas (DSWD-7).

Subay sa listahan sa DSWD-7 moabot sa 240 ka mga trabahante ang nipaubos sa ‘No Work, No Pay’ arrangement sud sa usa ka buwan.

Aron mahatagan og ayuda ang mga apektadong empleyado sa Bomedco, ang DSWD ug lokal nga Kagamhanan sa lungsod ug Nasudong Kagamhanan nigahin og tag P5,000 nga cash aid ug 10-kilos nga bugas.

Subay niini, nipatawag ang mayor og special session sa Konseho aron mahatagan og solusyon ang kasamtangang kahimtang.

Source: Sun.Star Superbalita (https://www.sunstar.com.ph/article/1938155/superbalita-cebu/balita/sugar-mill-workers-sa-norte-gihatagan-og-ayuda-sa-dswd)