Madayon kaha ang Barangay ug Sangguniang Kabataan Elections (BSKE) karong Disyembre 2022?

Si Mayor Michael Rama nagkanayon nga gustohon man niya o dili, ang chief executive sa nasod ra ang maghukom.

“On matters about barangay elections, either it should proceed or not, I am really leaving it to the President (Ferdinand “Bongbong”Marcos),” padayag ni Rama sa interbyu sa mga tigbalita.

Si Rama niingon nga adunay mga angay nga ikonsiderar sa pagpahigayon sa piniliay sama sa pundo nga gikinahanglan nga moabot og P8 bilyon para sa malampuson nga pagpahigayon sa eleksyon.

Ang Presidente ug mayor suod nga managhigala hinungdan nga si Marcos gisuportahan ni Rama sa miaging piniliay.

Niining bag-o, pinaagi sa tabang ni Marcos, napili nga presidente sa League of Cities in the Philippines si Rama.

Si Kongresista Richard Gomez sa ikaupat nga distrito sa Leyte niduso na sa House Bill 937 aron pag-oktaba sa BSKE ngadto na sa uwahing mga buwan sa 2023.

Sa Senado, si Senador Francis Escudero niduso usab sa iyang version sa Senate bill pag-postpone sa BSKE ngadto na sa ikaduhang Lunes sa Mayo sa 2024.

Ang duha ka mga magbabalaod pulos gianugnan sa P8 bilyones nga pundo para sa piniliay karong Disyembre.

Matod nila nga magamit kini sa pag-alibyo sa problema sa kamahal sa pagkaon.

Ang registration sa mga botante alang sa BSKE gisugdan niadtong Hulyo 4 ug natapos sa Hulyo 23, 2022.

Source: Sun.Star Superbalita (https://www.sunstar.com.ph/article/1937091/superbalita-cebu/balita/rama-pasagdi-si-bbm-mohukom-sa-barangay-elections)