Kapin sa P25 million nga balor sa illegal nga drugas nasakmit sa kapulisan sa Central Visayas atol sa usa ka adlaw nga Synchronized Anti-Criminality and Law Enforcement Operation (Sacleo) sa miaging semana.

Sa maong gidaghanon, ang labing dako og nakuha ang Mandaue City Police Office (MCPO) diin moabot ngadto sa P10.2 million nga illegal nga drugas nasakmit gikan kang John Alex Villaraz, 18, taga Brgy. Cabancalan.

Gisundan kini sa dakop sa dakbayan sa Toledo diin nasakmit ang laing illegal drugs nga balor og P7.4 million.

Ang nadakpan giila ni Police Brigadier General Roque Eduardo Vega nga si Raffy Chavez Hermona, taga Barangay Dapdap, dakbayan sa Toledo.

Nagsugod ang Sacleo sa alas 12:01 sa kaadlawon sa Agusto 13, 2022 ug gitapos sa alas 12:01 sa kaadlawon sa Agusto 14.

Nakasikop sila og 709 ka mga indibidwal nga dunay managlahing mga krimen sama sa illegal nga drugas, illegal gambling ug loose firearms.

Sa data nga gipakita sa Police Regional Office 7 (PRO) 7, nakasakmit sila og 3.7 ka kilo sa gituohang shabu nga adunay standard drug price (SDP) nga P25,420,780.

Nakalusad usab sila og 130 ka anti illegal gambling operations nga niresulta sa pagkasikop sa 295 ka mga sugarol ug pagkasakmit sa dul-an P27,000 isip sugal niini.

Source: Sun.Star Superbalita (https://www.sunstar.com.ph/article/1938060/superbalita-cebu/balita/p25m-balor-sa-drugas-nasakmit)