TUNGOD sa kakuwang sa public utility vehicles (PUVs) nga nagdagan atol sa mga "peak hours" sa miaging mga adlaw sa Davao City, giplano sa lokal nga panggamhanan nga ibalik ang Peak Hours Augmentation Bus Service (Phabs)

Gikompirma kini ni City Transport and Traffic Management Office (CTTMO) head Dionisio Abude ngadto sa SunStar Davao kagahapon sa hapon, Martes, Agosto 16, 2022.

Matud ni Abude nga kinahanglan pa sila nga moaplay og special permit gikan sa Land Transportation Franchising and Regulatory Board (LTFRB).

Wala pa hinuon mihatag si Abude og dugang detalye sa posibleng pagbalik sa Phabs.

Sa dihang gisulayan sa SunStar Davao sa pagkuha sa pahayag sa LTFRB alang sa dugang detalye niini, apan wala pa sila makahatag og dugang impormasyon.

Ang Phabs gidugang sa lokal nga panggamhanan sa Davao niadtong Pebrero 2019 sa pagtubag sa nagkadako nga "demand" alang sa dugang opsiyon sa public transportation sa mga peak hours sa dakbayan, ilabi na sa mga lugar sa Toril ug Catalunan Grande.

Sa milabay nga mga adlaw, sumasakay naglisud sa pagsakay pauli sa ilang mga balay tungod sa limitado nga ihap sa PUVs nga nagdagan ilabi na kung dunay kusog nga ulan nga moresulta sa pagbaha sa pipila ka bahin sa dakbayan.

Sa paghinabi sa pipila ka mga sumasakay, moabot pa og usa ka oras aron sila makasakay sa mga peak hours. Naa usahay, mas dugay pa ang paghuwat human mobundak ang ulan.

Pipila sa mga naapektuhan nga pasahero mao ang mga tinun-an, kansang tulunghaan bag-ohay lang nagsugod na ang face-to-face class.

Ang buhatan ni Vice President Sara Duterte, kanhi mayor sa Davao City, naglusad sa "Libreng Sakay" aron pagtabang sa galastuhan sa mga Pinoy tungod sa pagtaas nga pasahe sa Agosto 4 sa pipila ka bahin sa nasud, naglakip sa Davao City.

Ang Phabs-Libreng Sakay magserbi sa mga lugar sa Lasang, Toril, ug Calinan. Ang operasyon magsugod gikan alas 6 sa buntag hangtud alas 9 sa buntag ug 5 sa gabii hangtud alas 8 sa gabii.

Ang lugar sa Lasang serbihan matag Lunes ug Martes; matag Miyerkules ug Huwebes sa Toril; ug matag Biyernes ug Sabado alanag sa Calinan.

Source: Sun.Star Superbalita (https://www.sunstar.com.ph/article/1938032/superbalita-davao/balita/biyahe-sa-augmentation-bus-ibalik)