Ang Department of Health (DOH-7) nipahibawo nga anaa na sa 4,744,896 ka mga individual sa Central Visayas (CV) ang nakadawat sa ilang second dose sa bakuna batok sa coronavirus disease (Covid-19).

Si Dr. Van Phillip Baton, medical coordinator for emerging and reemerging infectious disease sa DOH-7, nagkanayon nga niabot na og 83.16 porsiyento ang nabakunahan sa upat ka lalawigan sa Region 7 gikan sa 5,705,754 nga maoy 70 porsiyento sa populasyon sa CV.

Sa upat ka probinsya, ang Cebu maoy adunay labing daghang nabakunahan nga niabot sa 1,705,279 gikan sa target nga 2,332,447 kun 73.11%

Ang Bohol adunay 803,258 nga nabakunahan gikan sa 960,029 nga target kun 83.65%, Negros Oriental nakabakuna og 654,939 ka mga tawo gikan sa 996,750 nga target population kun 65.71 % samtang ang Siquijor nilapas sa target population ug nakabakuna og 76,601 nga unta ilang target bakunahan mao ang 72,317 ka mga tawo kun 105.92% rate.

Ang tulo ka highly urbanized cities nga gilangkuban sa Cebu, Mandaue ug Lapu-Lapu pulos nilapas sa 100% sa ilang vaccination rate base sa record nga gipagawas sa DOH-7 niadtong Agusto 15, 2022.

Ang Cebu City adunay 106.58% human sila nakabakuna sa 780,381 ka mga individual diin lapas sila sa target nga 732,233; Lapu-Lapu City dunay 117.31% diin nakabakuna og 379,976 ka mga tawo gikan sa 323,900 nga target; ug Mandaue City naa sa 119.68% diin ilang nabakunahan ang 344,462 ka mga tawo gikan sa 287,816 nga target population.

Sa A2 population diin target sa DOH ang 85% sa ilang populasyon, ang CV anaa pa lang sa 60% human 406,598 kanila ang nabakunahan sa 677,106 nga target population.

Sa Region 7, aduna nay 2,112,241 nga target sa unang 100 ka adlaw sa 1st booster apan ang aktwal nga ilang nabakunahan moabot pa lang sa 26,329 ka mga individual.

Ang A2, target sa DOH-7 nga maka-booster sila og 202,409 ka mga tawo sulod sa 100 ka adlaw, apan ang nabakunahan anaa pa lang sa 725.

Sa mga nag-edad og 12-17 anyos, gikan sa 651,704 nga target population, 10,451 lang ang nakadawat sa ilang 1st booster kun 1.64%.

Sa mga tawo nga nag-edad og 18-59 anyos, 3,583,188 kanila ang target sa 1st booster shot apan 701,682 kanila ang aktuwal nga natusokan sa maong bakuna kun 20.20% accomplishment rate.

Source: Sun.Star Superbalita (https://www.sunstar.com.ph/article/1938156/superbalita-cebu/balita/8316-nakadawat-og-2nd-dose-sa-covid-vaccine-sa-cv)