DUHA ka pinangita sa balaud ang nasikop sa managlahing lugar sa probinsiya sa Bohol sa adlaw nga Sabado, Agosto 6, 2022.

Didto sa lungsod sa Cortes pasado ala una sa kadlawon, ang mga pulis sa lungsod sa Loboc ug Cortes, inubanan sa mga sakop sa Regional Intelligence Unit sa Central Visayas (RIU 7), mi-serve sa warrant of arrest nga giluwatan ni Judge Samuel Amila Biliran sa RTC Branch 50 sa lungsod sa Loay nga miresulta sa pagkasikop sa suspetsado nga si Junjun (di tinuod ngan), 38 anyos, lumad nga taga Sandingan Island sa lungsod sa Loon.

Ang maong arrest warrant adunay gitanyag nga piyansa nga P200,000 alang sa temporaryong kagawasan sa suspek, kinsa gipasanginlan nga nimolestiya sa 12 anyos nga batang babaye nga iya ra usab nga parente niadtong 2021.

Matud ni Police Staff Sergeant Urven Molina, imbestigador sa Loboc Police Station, nga si Junjun didto nagtagu-tagu sa Cortes human sa maong hitabo.

Samtang didto sa lungsod sa Anda, nadakpan ang usa ka Elmer Fernandez Deloy, 38 anyos, nga taga Purok 3, Barangay Casica, sa alas 10:30 sa buntag gumikan sa iyang kaso nga attempted homicide.

Si Judge Gertrude Belgica Jiro sa Municipal Trial Court 6th Judicial Region sa Dumangas, Iloilo City, diin nahitabo ang insidente, maoy niisyu sa warrant niadtong Hulyo 19, 2022 batok kang Deloy. (BBT)

Source: Sun.Star Superbalita (https://www.sunstar.com.ph/article/1937067/superbalita-cebu/balita/2-ka-wanted-sikop-sa-bohol)