Kapin sa 100 ka dugang nga mga kaso sa Omicron subvariant sa Sars-CoV-2, nga maoy hinungdan sa coronavirus disease (Covid-19), ang nakita sa Pilipinas, sumala sa Department of Health (DOH).

Sa press briefing, si DOH Officer-in-Charge Maria Rosario Vergeire niingon nga ang labing uwahing genome sequencing result nakamatikod sa 95 ka dugang nga BA.5 nga kaso, pito ka dugang nga BA.4 nga kaso, ug duha ka dugang nga BA.2.12.1 nga kaso.

“At the moment, the exposure of individuals, travel histories, and health status are being verified,” matod ni Vergeire.

Alang sa dugang nga mga kaso sa BA.5, 67 ka indibidwal ang gikan sa Davao Region, 25 gikan sa Soccsksargen, ug tag usa gikan sa Northern Mindanao, Caraga, ug National Capital Region (NCR).

Adunay 52 ka mga indibidwal ang hingpit nga nabakunahan, tulo ka mga kaso ang wala nabakunahan, samtang ang kahimtang sa pagbakuna sa nahabilin nga 40 padayon pa nga gisusi.

Mokabat na sa 83 ka mga indibidwal ang na-tag nga naka-recover, lima ang gipailawom pa sa isolation, samtang gi-verify pa ang status sa nahabiling pito.

Sa kinatibuk-an, aduna nay 3,107 ka mga kaso sa BA.5 sa nasud.

Sa dugang nga mga kaso sa BA.4, lima ka indibidwal ang gikan sa Soccsksargen ug duha gikan sa Davao Region.

Ang tanan nga pito ka mga kaso hingpit nga nabakunahan ug gi-tag nga naayo na, ingon sa DOH.

Sa kaso sa BA.4, ang nasud aduna nay total nga 104.

Sa dugang nga kaso sa BA.2.12.1, ang duha ka indibidwal parehong taga Davao Region. Ang duha pulos nabakunahan batok sa Covid-19.

Ang duha ka mga kaso gi-tag usab nga na-recover. Sa kinatibuk-an, aduna nay 174 ka kaso sa BA.2.12.1 sa Pilipinas. (HDT sa SunStar Philippines)

Source: Sun.Star Superbalita (https://www.sunstar.com.ph/article/1937109/superbalita-cebu/balita/100-ka-dugang-kaso-sa-omicron-sa-pilipinas-nabantayan)