PATAY ang pito ka mga armado samtang laing lima ang nadakpan sa gilusad nga Law Enforcement Operation sa mga awtoridad alas 4 sa kaadlawon, Huwebes, Hunyo 23, 2022, sa usa ka barangay sa Rajah Buayan, Maguindanao Province.

Apil sa lima nga napatay mao si Turkey Utto Latip, kinsa wanted sa kasong frustrated murder, ug Katindig Mustapha, kinsa duna say giatubang nga kasong robbery with homicide.

Gibutyag ni Police Regional Office-Bangsamoro Autonomous Region (PRO-BAR) Director Brigadier General Arthur Cabalona nga isilbi na unta nila ang warrant of arrest sa hiniusang puwersa sa Criminal Investigation and Detection Group (CIDG-BAR), Regional Mobile Force Battalion (RMFB), uban ang militar batok sa mga suspek sa Barangay Mileb, Rajah Buayan.

Apan pasulod pa lang ang raiding team sa lugar, gipaarakan na sila sa grupo sa usa ka Kumander Torque, hinungdan nga napugos ang raiding team sa pagbawos ug nahitabo ang kinse minutos nga binakbakay.

Nakuha gikan sa posisyon sa mga napatay ug mga nadakpan ang siyam ka mga tag-as nga matang sa armas, mga bala, magazines, eksplosibo ug mga personal nga kagamitan.

Source: Sun.Star Superbalita (https://www.sunstar.com.ph/article/1932885/superbalita-davao/balita/ronda-sa-kaadlawon-mikalas-7-ka-armado)