Usa ka pulis sa Tagbilaran City Police Station sa Bohol Police Provincial Office (BPPO) nga nag-viral sa social media tungod sa iyang paggukod sa motorista nga milikay sa checkpoint niadtong Mayo 4, 2022, gipasidunggan sa Police Regional Office (PRO) 7 nunot sa gipakita niini nga kinaiya nga mapailubon.

Sa Facebook group nga “Moto Sikop” didto unang na-post ang video sa ginukdanay sa pulis nga naila nga si Police Staff Sergeant Krislam Baguil iyang gigukod ang motorista nga walay helmet ug walay plate number ang gimaneho niini nga motorsiklo.

Madungog sa video ang mando ni Baquil sa driver nga ipadaplin niini ang iyang gimaneho nga motor apan inay motuman mipasutoy pa hinuon kini sa pagpadagan.

Makita usab sa video nga hapit kini madisgrasya sa laing motorista maayo nalang kay nakabawi ra kini.

Apan sa dihang gidikit na ni Baquil ang iyang motor, gidasmag na hinuon kini sa suspetsado kaniya dungan sa pag-ambak nga mi resulta sa iyang pagkatumba.

Bisan pa man sa iyang nahiagoman, mibangon siya ug gigukod ang suspetsado nga ang usa ka tiil wala nay sapatos tungod kay nahabilin sa natumba niya nga motor.

Nadakpan ang suspetsado nga giila usab sa ngalan nga si alyas Mark Gervin Sarmiento Culajara, 31, taga Purok 7, Hontanosas Street, Barangay Poblacion III, Tagbilaran City.

Dinhi nasuta nga wala diay lisensiya ug rehistro ang gimaneho nga motor sa suspetsado ug ang nakadaot kay parolado diay kini alang sa iyang temporaryo nga kagawasan nunot sa iyang mga kaso nga giatubang.

Matod ni Baquil nga nahinabi sa mga tigbalita nga niadtong mga tungora, nagpahigayon silag patrolya uban sa iyang kaubanan.

Nasigpatan ang motorista nga walay plate number ang motor nga gimaneho niini ug wala pa maka-helmet.

“Nagpatrolya mi ato unya nakita namo ni siya nga walay plate number ang motor ug wala pa gyud mag-helmet, unya mipadagan na hinuon siya palayo namo mao to amo gigukod,” matod ni Baguil.

Giangkon ni Baquil nga dakpon lang gyud nila kon aduna silay masakpan nga kriminal ug dili mogamit sa ilang kusog sama sa armas.

Mao matod pa kini ang gitudlo sa ilang mga labaw sa kapulisan sa probinsya sa Bohol nga kon mahimo, ipatuman ang maximum tolerance.

“Mao man gyud ang gitudlo sa among chief of police nga before mi migawas sa among duty kay field man mi, mao gyud na permi niya isulti nga in case naa mo masugatan nga hitabo, maximum tolerance lang kon mahimo gyud i-take down lang nato kanang mga ingon ana mga violators,” dugang ni Baquil.

Tungod sa gihimo sa maong police, daghan ang nakadayeg nga mga netizen ug miawhag sa ubang kapulisan nga sundogon ang gihimo ni Baquil.

Si Police Brigadier General Roque Eduardo Vega hepe sa Police Regional Office 7 nalipay sa gipakita sa iyang sakop.

Gumikan sa gipakita sa taas nga pasensya, determinasyon ug commitment sa trabaho, gidayeg niya kini.

“In the PNP (Philippine National Police) service, there will be many instances that your patience in the performance of your duty will be put to a test, especially in responding to situations similar to that. Always follow the PNP Operational Procedures, our bible and you will never go wrong. In everything we do, we put our heart into it and to the people, we owe to serve and protect,” matod ni General Vega.

Si Baguil, 33, lumad nga Kolambogan Lanao del Norte ug misulod sa police service niadtong 2011.

Usa na ka amahan sa 2 anyos niini nga anak babaye nga iyang gisaaran nga hatagan og maayong kaugmaon sa tinarong nga paagi.

“Sa trabaho isip usa ka pulis, observe gyud mi sa maximum tolerance. Importante usab ang safety ug presence of mind kon moresponde me. Apil ni sa among gipanumpaan ug bug-at na responsibilidad na magtinarong sa among pagpanerbisyo ug ampingan gyud kini,” dugang ni Baguil.

Nahimong sakop sa Motorcycle Anti-Street Operatives (MASCO) sa Tagbilaran City police station si Baquil niadtong 2016.

Tanan niini nga lakaw matag adlaw iya kining i-record gamit ang iyang camera aron kadtong mga nakalapas sa balaod trapiko sa Tagbilaran City nga molalis, iyang mapakita unsay nahimo niini nga kalapasan.

Naanad na usab nga iyang tudloan ang mga madakpan nga traffic violators aron mosunod na kini panahon nga mogamit na sila sa karsada sa Tagbilaran.

Source: Sun.Star Superbalita (https://www.sunstar.com.ph/article/1929744/superbalita-cebu/balita/pulis-sa-tagbilaran-city-nga-nag-viral-sa-social-media-gipasidunggan-sa-pro-7)