Patay ang usa ka drug pusher human nisukol sa awtoridad apan nasikop ang tulo ka mga kauban niini sa buy-bust sa sa Purok Tambis, Barangay Poblacion, lungsod sa San Remigio, alas 5:05 sa hapon sa Sabado, Mayo 21.

Patay si Alden Lindayaw, 42, alyas “Kimay” ug molupyo sa nahisgutang lugar, dead-on-arrival (DOA) sa tambalanan sa dakbayan sa Bogo.

Samtang nasikop sila si Felix Lepiten Abao III, 29, ulitawo laborer; Espina Fuentenegra, 29, usa ka panday; ug Anadomene Espina Mabaga, 47, biyuda, pulos taga Purok Nangka, Poblacion, San Remigio.

Ang mga sakop sa Drugs Enforcement Unit (DEU) sa San Remigio Police Station mipahigayon sa buy-bust operation.

Ang mga suspek gipalitag usa ka pakite nga shabu balor P500.

Nakabantay sila si Lindayaw ug misakay sa motorsiklo.

Apan dihang duol na kini sa ilang panimalay, mibunot sa kalibre .45 sa armas ug nipabuto ngadto sa mga pulis hinungdan nga napusilan sa operatiba.

Source: Sun.Star Superbalita (https://www.sunstar.com.ph/article/1929745/superbalita-cebu/balita/1-patay-3-nasikop-atol-sa-buy-bust-sa-san-remigio)