IPATUMAN sa kapulisan sa lalawigan sa Sugbo ang bag-ong giluwatan nga Executive Order (EO) No. 35B ni Governor Gwendolyn Garcia sa Lunes, Enero 17, 2022 bahin sa pagmuntar og border checkpoints sa tanang kalungsoran sa Sugbo aron pagsusi sa publikong mga sakyanan.

Kini human ang lalawigan sa Sugbo ipaubos na usab sa Alert Level 3 sugod sa Dominggo, Enero 16, 2022 base sa kamandoan sa Inter-Agency Task Force (IATF) tungod sa nagsakang mga kaso sa coronavirus disease 2019 (Covid-19).

Si Police Colonel Engelbert Soriano, hepe sa Cebu Police Provincial Office (CCPO), nagkanayon nga alas 6 sa buntag sa naasoy nga adlaw, ang kapulisan sa kalungsoran magsugod sa pagpatuman sa ilang border checkpoints aron susihon ang publikong mga sakyanan kon nituman ba sa 75 porsiyento sa kapasidad sa ilang mga pasahero.

Tanang lagda nga giluwatan sa gobernador sa EO ilang ipatuman sa border checkpoints.

Dugang ni Soriano, sa miaging semana unta kini nila subling ipatuman apan ilang gipugngan tungod sa grabeng epekto sa pag-igo sa bagyong Odette sa Disyembre 16, 2021 nga nakamugna og dakong kadaot sa lalawigan, labina sa habagatan ug kasadpan sa Sugbo.

Si Soriano nagkanayon nga kon adunay mga sakyanan nga molapas sa kamandoan, isyuhan nila og temporary operators permit (TOP) ang mga drayber ug nasayod na niini ang ilang operators.

“Yes, as usual, nakita naman natin yung naging cooperation nila initially, when we first implemented EO 35. This time we expect the same cooperation from all of them dahil alam naman natin na nakatulong yun talagang halos mawala ang Covid-19 sa probinsya..,” matod ni Soriano.

Hugot usab nila nga ipatuman ang pagpasul-ob sa facemask sa sulod sa mga sakyanan sama sa gihimo nila sa milabay nga tuig diin nisaka pag-ayo ang kaso sa Covid-19.

ALERT LEVEL 3

Halos tibuok Central Visayas (CV) na ang gipaubos sa Alert Level 3 sugod sa Enero 16, Dominggo, hangtod sa Enero 31.

Una nang gipaubos sa IATF sa Alert Level 3 ang dakbayan sa Sugbo ug Mandaue sugod sa Enero 14, hangtod sa Enero 31.

Si Cabinet Secretary ug Acting Presidential Spokesperson Karlo Nograles niingon kagahapon, Enero 14, nga giaprobahan sa IATF ang Resolution 157-A, diin dugang 55 ka mga lalawigan o dapit sa nasod ang giisa sa Alert Level 3 nga naglakip sa Lapu-Lapu City, Bohol, Cebu province, Dumaguete ug Negros Oriental.

Ang isla nga lalawigan sa Siquijor sa Alert Level 2.

Matod ni Nograles, ang pag-isa sa alert level tungod sa pagsaka sa mga kaso sa Covid-19 sa nasod.

Ang kagamhanan nanawagan na usab sa publiko sa hugot nga pagsunod sa minimum public health standards sa pagsanta o pagpakunhod sa kaso sa Covid19.

Source: Sun.Star Superbalita (https://www.sunstar.com.ph/article/1918115/superbalita-cebu/balita/mga-lungsod-mag-checkpoint)