KANHI barangay kapitan nga giilang number 1 sa most wanted person sa kapulisan sa lungsod nadakpan sa Barangay Tajao, lungsod sa Pinamungajan, alas 8:30 sa buntag sa Biyernes, Enero 14.

Ang nasikop mao si Elmerlito Recla Panlaan, 55, kanhi kapitan sa Barangay Anopog, Pinamungahan, kasamtangang nagpuyo sa Brgy. Cabiangon, Pinamungajan.

Si Police Executive Master Sgt. Peter Cuanso, imbestigador sa Pinamungahan Police Station nga nahinabi sa Superbalita Cebu, nagkanayon si Panlaan nalutsan og warrant of arrest sa kasong malversation of public property o giingong wala pag-uli sa armas.

Si Judge Ruben Altubar sa Regional Trial Court (RTC) 7 Branch 59 sa dakbayan sa Toledo maoy niisyu sa warrant of arrest nga gipitsahan og Abril 6, 2016.

Matud ni PEMS Cuanso, ang armas sa local government unit (LGU) nga giisyu sa kanhi kapitan wala mauli niini.

Apan ang kanhi kapitan nirason nga giuli na niya ang armas sa kanhi mayor sa lungsod pero wala makapakita og acknowledgement receipt sa pag-uli sa armas.

Ang armas gipanag-iya sa LGU sa Pinamungajan pero ang nabutang nga ngalan sa lisensiya iya sa kanhi kapitan, dugang sa kapulisan.

Ang korte mitugot sa kanhi kapitan nga makabutang og P40 mil nga piyansa alang sa iyang temporaryong kagawasan.

Source: Sun.Star Superbalita (https://www.sunstar.com.ph/article/1918167/superbalita-cebu/balita/kanhi-kapitan-mihimakak-dihang-nasikop-tungod-sa-giingong-wa-pag-uli-sa-armas-sa-kagamhanan)