TULO ka mga illegal structure ang gi-demolish sa Probe team human nalutsan og clearing order gumikan sa paglapas sa ilang balay sa yuta sa nga gipanag-iya sa Cebu City Government didto sa barangay Canduman, dakbayan sa Mandaue.

Si Raquel Bohol-Arce, pangulo sa Probe ang struktura nga ilang giguba gumikan sa paglapas niini ngadto sa utlanan nga gipanag-iya sa kagamhanan sa dakbayan sa Sugbo.

Kini gumikan kay ang urban housing sa Mandaue City nagtalikdanay sa luna nga iyang sa Cebu City.

Gihulagway ni Arce nga nihimo of extension sa ilang balay ang orihinal nga benepisyaryo sa urban housing sa Manduae ug gipapuy-an sa anak niini nga aduna nay pamilya kinsa nakapahimulos sulod sa dugay nga katuigan.

Gisugdan na og hawan sa Probe team sanglit gamiton kini sa Cebu City kay nagsilbi kining relocation site sa kapin o kulang 70 ka pamilya nga gi-demolish sa Citi Center, barangay Kamagayan niadtong 2013.

Sa laing bahin, nahunong ang implementasyon sa road right of way alang sa kapin 200 ka pamilya nga nagpuyo luyo sa Villa San Jose sa barangay San Jose sa dakbayan sa Sugbo.

Kini human nihangyo ang tag-iya sa balay kansang pader gawas sa iyang pinuy-anan ang maigo sa demolisyon ug laing tulo ka estruktura ang mapahak tungod sa ipatuman nga di mominos tres metros nga agianan.

Apan mobayad ang City Government ngadto sa mga apektado tag-iya sa yuta ug estruktura.

Ang road right of way gikinahanglan nga ipatuman aron luwas ang gatusan ka pamilya labi na panahon sa emerhensiya. (PAC)


Source: Sun.Star Superbalita (https://www.sunstar.com.ph/article/1907279/Superbalita-Cebu/Balita/Milapas-nga-istruktura-gi-demolis?ref=rss&format=simple&link=link)