Gidakop sa kapulisan sa Dakbayan sa Toledo ang usa ka bayot nga giakusahan sa 18 anyos nga lalake nga ni-rape kaniya sa mga alas 4:50 sa Miyerkules sa kaadlawon, Septiyembre 15, 2021 sa Sityo Luray, Barangay Poblacion, Toledo City.

Ang biktima nga si Roy (di tinuod nga ngan), traysikad driver, nisumbong sa kapulisan sa dakbayan hinungdan nga nasikop ang suspek nga giilang si Jerny Mahidlawon Salvani, 24, taga sityo Drilling, Barangay Luray 2, Toledo City.

Matod ni Police Lieutenant Colonel Junnel Caadlawon nga niasoy kanila si Roy nga samtang siya nag-atang og pasahero, kalit nga niabot si Salvani, nitanyag kaniya og P200 kon mokuyog kaniya.

Nibalibad siya apan giguroy siya ni Salvani pinaagi sa pagkupot sa iyang kamot ug gidala sa sulod sa balay sa suspek nga diha lang sa duol.

Sulod sa lawak ni Salvani, giingong gihuboan siya ug naghubo usab ang bayot dayon giingong gilugos siya pinaagi sa pagpasud sa kinatawo niini sa iyang sampot.

Tungod sa ka sakit sa iyang gibati, matod ni Caadlawon nga ni-report si Roy sa ilang buhatan human niini.

Giadto gilayon nila si Salvani sa balay mga alas 6:30 sa buntag ug gipahibawo sa reklamo batok kaniya.

Giingong niluhod ug nangayog pasaylo si Salvani kang Roy, apan wa madala sa hangyo ang teenager.

Naa gibilanggo sa Toledo City Police Station si Salvani alang sa kasong rape (sodomy) nga ipasaka batok kaniya. (GPL)


Source: Sun.Star Superbalita (https://www.sunstar.com.ph/article/1907315/Superbalita-Cebu/Balita/Bayot-gireklamog-rape-sa-18-anyos-nga-traysikad-driver?ref=rss&format=simple&link=link)