Dul-an sa 300 ka mga tawo ang nadakpan sa kapulisan sa Probinsya sa Sugbo sa usa ka semana nga simultaneous anti-criminality and law enforcement operation (Sacleo) diin labing daghan nasikop adunay mga warrant of arrest ug gisundan sa mga sugarol.

Gihulagway ni Police Colonel Engelbert Soriano, hepe sa Cebu Police Provincial Office (CPPO), nga malampuson sila sa ilang usa ka semana nga dungan nga anti-criminality and law enforcement operations niadtong Mayo 31-Hunyo 6, 2021.

Sa datus nga gipahibalo ni Soriano, moabot ngadto sa 69 ka operations ang gihimo sa 50 ka police stations sa tibuok lalawigan nga niresulta sa pagkasikop sa 295 ka mga tawo usa niini ang nakalas didto sa Lungsod sa San Fernando.

Sa kampanya sa illegal drugs nakadakop silag 77 ka drug personalities diin moabot usab sa kapin P500,000 nga balor sa shabu ang ilang nasakmit.

Naka-serve sila og 107 ka warrant of arrest diin lima niini giila nga most wanted person sa tibuok probinsya ug laing mga most wanted persons sa kalungsoran samtang 111 ang nasikop sa nagkadaiyang illegal gambling sama sa tigbakay ug uban pa.

Sa 50 ka police stations. Gitug-an ni Soriano nga dunay wa makalabok sa ilang operation ug iya kining gipangayoan sa pagpasabot.

Magtagbo ang mga opisyal sa provincial command aron matuki sa ilang conference unsay angayan nga buhaton sa mga hepe sa mga police station nga ubos ang performance. (AYB)


Source: Sun.Star Superbalita (https://www.sunstar.com.ph/article/1897325/Superbalita-Cebu/Balita/300-ka-tawo-nasikop-sa-CPPO-sa-ilang-dungan-nga-operasyon?ref=rss&format=simple&link=link)