Tulo ka mga durugista ang napatay ug 10 ka kilo sa gituohang shabu nasakmit sa usa ka drug bust nga nisangko sa ginukdanay ug pinusilay gikan sa Barangay Campo 4, Dakbayan sa Talisay hangtod sa Transcentral Highway sa Barangay Taptap, Dakbayan sa Sugbo sa Biyernes sa gabii, Hunyo 10, 2021.

Ang buy-bust gipangulohan sa Police Drug Enforcement Unit (PDEG).

Si Police Brigadier General Remus B. Medina, pangu sa PDEG, niingon nga human matigayon ang transaction, nakabantay ang tulo ka drug pushers hinungdan nga nahitabo ang pinusilay.

“Nagkaroon tayo ng buy-bust operation, initially doon sa Talisay, Campo 4. Na consummate yung buy-bust and then na detect ng grupo na to na mga operatiba ang ka transaction nila kaya nagkaputokan sila dun,” asoy ni Medina sa mga tigbalita.

Nisakay gilayon ang tulo ka mga durugista sa usa ka itom nga Toyota Vios nga way plate number.

Daling nakig coordinate ang mga anti drug operative sa ubang mga buhatan sa kapulisan, apil na sa Highway Patrol Group (HPG), Cebu City Police Office (CCPO) ug Philippine Drug Enforcement Agency (PDEA) 7.

Ang mga durugista nababagan na sa ilang pag abot sa Transcentral Highway (TCH) diin giingong nakigpinusilay ang tulo, apan napatay.

Way nasamdan sa habig sa kapulisan.

Ang nakuha naglakip sa 10 ka kilo sa gituohang shabu nga dunay Dangerous Drugs Board (DDB) value nga P68 milyunes. Duna say nakuhang mga pusil, usa niini M-16 Armalite rifle ug buy bust money nga budol nga P2.8 milyunes.

Matod ni Medina nga ila pang giila ang tulo kay way nakuhang bisan usa ka identification (ID) card.

Apan matod sa usa ka tinubdan, usa sa tulo kanhi hitman ni self confessed drug lord Franz Sabalones.

Usa sa tulo nasuta sa Superbalita Cebu nga dunay patik nga ‘City of Naga.’ (PAC, REV)


Source: Sun.Star Superbalita (https://www.sunstar.com.ph/article/1897378/Superbalita-Cebu/Balita/3-ka-durugista-napatay-P68M-nga-shabu-nasakmit?ref=rss&format=simple&link=link)