Libuan ka mga motorsiklo, apil na ang four-wheeled nga mga sakyanan, anaa pa sa impounding area sa Cebu City Transportation Office (CCTO), uban niini sobra na sa 10 ka tuig, gumikan sa kapakyas paglukat sa mga tag-iya.

Base sa record sa CCTO, anaa pa sa 2,144 ka mga unit ang naa sa ilang kustodiya sukad niadtong 2010, apan apil na niini ang mga sakyanan nga gi-turnover sa Philippine National Police gumikan sa aksidente.

Si Paul Gotiong, deputy chief of operations ug spokesperson sa CCTO, nagkanayon nga niadtong 2020 ug Enero-Mayo 2021, ang CCTO naka-impound og 4,684 ka mga unit nga gilangkuban sa motorsiklo, four-wheeled nga mga sakyanan, traysikad, e-bike, trucks ug trailers. Kining mao nga gidaghanon way labot sa 2,144 ka mga sakyanan.

Ang 3,963 ka mga unit ilang na-release gumikan sa pagbayad sa mga tag-iya sa violation nga ilang nalapas sama sa kapakyas pag-presentar sa ilang official receipt, certificate of registration o way driver’s license ang mga nagmaneho.

Base sa ordinansa sa Cebu City, ang mga ma-impound nga sakyanan adunay pagabayran nga storage fee.

Matod ni Gotiong, ang storage fee tag P100 matag adlaw para sa mga motorsiklo, P300 para sa mga four-wheeled ug P500 para sa mga truck.

Si Gotiong nitumbok nga kini maoy usa sa gitumbok nga hinungdan nganong adunay daghang mga wala malukat nga sakyanan.

Ang nahimutangan sa mga sakyanan sa impounding area sa South Road Properties natuboan na lang og mga sagbot tungod sa kadugay na.

Ang CCTO naka-isyu og 14,009 ka mga traffic citation tickets (TCT) sa Mayo, mas ubos sa 15,737 ka TCT nga ilang naisyu sa Abril. (PAC)


Source: Sun.Star Superbalita (https://www.sunstar.com.ph/article/1897330/Superbalita-Cebu/Balita/2144-ka-sakyanan-naa-sa-CCTO-impounding-area?ref=rss&format=simple&link=link)