LIBKASON na ni Cebu City Mayor Edgardo Labella ang liquor ban sa Siyudad sa Sugbo sugod sa Biyernes, Mayo 7, 2021 human sa kapin sa tulo ka mga buwan nga iya kining gipahamtang og balik.

Sa iyang press conference sa Martes, Mayo 4, 2021, si Labella nipahibawo nga mo-isyu siya og executive order aron paglibkas sa ban.

Matod ni Labella nga kini tungod sa hangyo sa Cebu Chamber of Commerce and Industry (CCCI) aron sa pagbuhi og balik sa ekonomiya, apil na ang mga restaurant.

Ang Emergency Operations Center (EOC) ug city health officials nirekomendar usab pabor sa paglibkas sa ban.

“Duna koy iisyu nga executive order, tungod sa hangyo sa Cebu Chamber of Commerce nga dunay rekomendasyon ang EOC nga ato nang i-lift ang liquor ban,” nagkanayon si Labella.

Matod niya nga kinahanglan balansehon ang panglawas sa katawhan ug pagbuhi sa ekonomiya.

“Una ta moisyu aning executive order, ang EOC duna nay favorable recommendations. Ang city health officials duna nay favorable recommendations. Unya duna tay hangyo gyud sa kining Cebu Chamber of Commerce to revive the economy especially sa atong mga restaurants. We have to make a balance,” pagpasabot sa mayor.

Apan nipahimangno si Labella nga ang mga establisemento kinahanglan nga mosunod sa mga health protocol ug limitahan og duha ka mga botelya sa matag kustomer ang mahimong imnon.

MARSHAL IPAKATAP

Aron mapatuman nga higpit ang mga protocol, magtukod ang Siyudad og liquor marshal nga maoy mo-monitor sa mga establisemento.

Ilang kuhaon ang manpower gikan sa job order (JO) nga mga kawani, kansang tahas mao ra ang paglibot sa mga establisemento.

Sa unang pagkasakop, igo lang kining warningan, apan kon magpadayon sa paglapas ang establisemento, posibleng kuhaan kini sa business permit ug pasirhan.

Niadtong Pebrero Pebrero 3, 2021, gipatuman og balik ni Labella ang liquor ban tungod sa pagsulbong sa mga kaso sa coronavirus disease 2019 (Covid-19) ug kapakyas sa mga establisemento sa pagtuman sa duha lang ka botelyang ilimnon nga i-serve.

Ang paglibkas sa liquor ban gihimo ni Labella niadtong Oktubre 2020 human nikanaog og maayo ang mga kaso sa Covid-19.

Si Labella niawag usab sa Konseho niadtong Pebrero sa pagpalabang og mas bug-at nga silot sa mga molapas sa liquor ban.

BANTAYAN GIHAPON

Samtang ang kapulisan sa Siyudad sa Sugbo nangandam sa hingpit nga paglibkas sa liquor ban sa umaabot nga mga adlaw.

Aron nga kalikayan ang pagdagsa unya diha sa mga kustomer sa mga imnanan ingon man ang padayong pagpatuman sa health protocol.

Matod ni Police Lieutenant Colonel Wilbert Parilla nga ilang nalang gipa-abot ang executive order sa mayor mahitungod niini.

“As of now naka-prepare naman na ang atoang guidelines, gani usa ni sa mga basehan nga gihatag sa chief sa atoang EOC ngadto sa mayor para himuong guidelines paggama og executive order,” matod ni Parilla.

Dugang ni Parilla nga sa gihimong guidelines sa emergency operation center nga giduso ngadto sa buhatan ni Mayor Labella dili pa mahimong mag-inom sa mga publikong lugar sama sa daplin sa karsada.

Kon masakpan sa kapulisan nga molapas ang nagdumala sa kan-anan mahimong manubag sila sa kagamhanan sa siyudad sa sugbo nga maka apekto sa ilang lisensya.

Padayon gihapon nga ipatuman ang curfew gikan sa 11:00 sa gabii ngadto na sa 5:00 sa kaadlawon.

Tungod niini awhag sa kapulisan sa mga establisamento nga labing maayo manira na sila 30 minutos sa dili pa ang oras sa curfew aron dili maabtan ang mga customer niini diha sa kalsada. (REV, AYB)


Source: Sun.Star Superbalita (https://www.sunstar.com.ph/article/1893686/Superbalita-Cebu/Balita/Liquor-ban-sa-Cebu-City-libkason-na?ref=rss&format=simple&link=link)