GIBUTYAG ni Lapu-Lapu City Mayor Junard Chan nga andam na modawat ang kagamhanan sa mga langyaw nga turista nga mobisita sa dakbayan.

Kini human nga gipahibawo siya sa Presidential Communication Operations Office (PCOO) kalabot sa IATF Resolution No. 13 atol sa ilang Network Briefing News diin ang mayor ang guest niadtong Lunes, Mayo 3, 2021.

Ubos sa naasoyng resolution ang usa ka langyaw mahimong makasulod sa nasud basta aduna silay valid visa, pre-booking accommodation sa usa ka hotel sulod sa pito ka gabii ug uban pa.

“They can come to Lapu-Lapu City as long as they are fully vaccinated and within 72 hours before sa ilang flight naka RT-PCR sila (tested negative), that’s our stand for Lapu-Lapu,” matod ni Chan atol sa pakighinabi sa mga tigbalita kaniya.

Dugang sa mayor nga kon ang usa ka langyaw wala pa mopaubos og Reverse Transciption-Polymerase Chain Reaction (RT-PCR) test sa iyang gigikanan hayan mopaubos siya sa maong test sa iyang pag-abot sa tugpahanan.

Sa pangutana nga ang bag-ong variant mogawas lang ang sintomas lima ka adlaw human siya posibleng matapti, wala mabalaka ang mayor kalabot niini.

“Naka-bubble man ni sila (inside hotels) especially kung turista,” matod ni Chan.

Sa pagkakaron ang mayor naghuwat pa usab sa tubag ni Health Secretary Francisco Doque III kalabot sa pagpasulod na sa hingpit sa mga turista sa dakbayan nunot sa gihan-ay na nga mga protocol kalabot niini.

Alang sa mayor panahon na nga ablihan ang ganghaan sa dakbayan sa mga langyaw nga turista sanglit inanay naman nga nikunhod ang kaso sa coronavirus disease Covid-19 sa dakbayan.

Gawas niini nakita na usab sa mayor nga nakat-on na ang kadaghanan sa pagsunod sa mga health protocol human sa kapin usa ka tuig nga pag-atubang niining pandemya.

Masaligon si Chan nga ang mga langyaw nga turista nga mobisita sa dakbayan magmatngon usab sa Covid.

GISUPORTAHAN

Suportado ni Cebu Provincial Governor Gwendolyn Garcia ang plano ni Mayor Chan nga palambuon balik ang turismo.

“I am one with Mayor Ahong Chan because his tourism sector is really severely affected,” sigon ni Garcia.

Sa wala pa ang pandemya, niingon si Garcia nga sagad sa mga turista sa Sugbo gikan sa Korea, China, Japan ug uban pang nasod. Ang turismo ang nagpadagan sa revenue sa syudad sa Lapu-Lapu lakip na sa probinsya sa Sugbo.

Giangkon ni Garcia nga gusto siyang makighinabi ni Chan kabahin niining pagpalambo og balik sa turismo sa Sugbo.

“If kung mga OFWs or returning Filipinos atong na-test upon arrival and then atong gipa-transient usa sa dili pa mogawas ang results. So, why can’t we do the same for other countries that have also been able to manage their Covid cases? that have an established Covid-19 management system,” sigon ni Garcia. (GCM, KFD)


Source: Sun.Star Superbalita (https://www.sunstar.com.ph/article/1893688/Superbalita-Cebu/Balita/Langyaw-nga-turista-makasud-na-sa-Lapu-Lapu-City?ref=rss&format=simple&link=link)