MOKABAT sa 83 ka mga kasong kalapasan sa balaud sa trapiko ang napasaka sa legal section sa Cebu City Transportation Office (CCTO) batok sa mga driver nga wa mobayad sa ilang mga multa.

Ang kaso niagi una sa Cebu City Prosecutors Office una pa giduso ngadto sa korte tungod sa wa pagpakabana sa mga driver sa pagbayad.

Ang kalapasan kinahanglan bayran sulod sa 72 oras human sa pag-isyu sa traffic citation ticket (TCT).

Matod sa CCTO nga kon moabot na sa korte, modako na og maayo ang bayranan matag kalapasan.

Moluwat usab og warrant of arrest ang hukmanan aron pagpabayad sa driver nga nakalapas.

Sa Abril, mokabat sa 15,737 ang naisyu nga TCT sa CCTO ngadto sa mga driver nga nakalapas.

Sagad sa mga kalapasan naglakip sa disregarding traffic signs sama sa no stopping anytime, parking on sidewalk, expired ang registration, expired ang lisensya ug uban pa.

Samtang sa samang buwan, naka impound usab sila og 211 ka mga motorsiklo, 16 ka bikes, upat ka mga traysikad, usa ka traysikol, unom ka mga PUJ, 16 ka dumptrucks ug 10 ka Elf truck.

Mokabat usab sa 522 ka mga sakyanan ang ilang na-clamp sa gabii ug adlawan nga operasyon.

“Gusto namo ipahinumdom usab sa publiko nga sundon ang mga lagda sa trapiko labi na kung adunay mga sign board ug likayan nga makababag sa mga karsada ug mga sidewalk,” matod sa CCTO. (REV)


Source: Sun.Star Superbalita (https://www.sunstar.com.ph/article/1893682/Superbalita-Cebu/Balita/CCTO-mipasaka-og-83-ka-kaso-batok-sa-mga-driver?ref=rss&format=simple&link=link)