Gilusad sa Kagamhanan sa Lalawigan sa Sugbo ang laing hugna sa Sugbusog program, ning higayuna sa pampublikong mga tunghaan sa lalawigan.

Ang programa tawgon nga “Sugbusog sa Eskwelahan, Estudyanteng Busog, Luwas ug Himsog.”

Nilagda og memorandum of understanding (MOU) sa Abril 8, 2021 ang Probinsya ug ang Central Visayas offices sa Department of Education (DepEd), Department of Agriculture (DA) ug Department of Science and Technology (DOST) alang sa pagtinabangay nga mapalambo ang programa sa mga tunghaan.

Ang programa lakip sa food security plans ni Cebu Governor Gwendolyn Garcia gumikan sa padayon nga nasinating pandemya sa nasud.

Gusto ni Garcia nga ang Sugbo di kinahanglang magsalig sa ubang mga dapit sa nasod sa panginhanglan niini sa pagkaon.

Usa sa paagi niini mao ang indigay sa mga tunghaan sa may labing nindot ug mabungahon nga garden.

Ang DA 7 maoy mohatag sa libreng mga liso sa pipino, okra, tawong, kalbasa ug uban pang utanon.

Lakip na usab ang mga herbal ug medicinal plants.

Ang DOST 7 maoy gitahasan sa pagtudlo sa bag-ong mga paagi sa paghimo og mga produkto gikan sa ani niini.

Samtang ang DepEd 7 ug DepEd Cebu Province maoy gitahasan sa pag-monitor sa mga tunghaan aron pagsiguro nga nisalmot. Una na nga gipahibawo ni Garcia nga adunay premyo ang tunghaan nga makadaog sa indigay.

Wa matino kon kwarta ba o mga butang nga gikinahanglan sa tunghaan.

Nalipay usab si DepEd 7 Director Salustiano Jimenez sa maong kalamboan sanglit di maalkanse ang mga tunghaan bisan kon mapildi sa indigay tungod kay ang ani adto gihapon padulong sa mga bata ug tunghaan.

“We are facing the pandemic and this addresses so much concerns and health issues. Our people nowadays are suffering stress and our body needs immune system, boost our immune system while planting in our garden is sort of a good exercise...Our Department of Education (DepEd) 7 is 100 percent dedicated to support this very laudable activity or program of the Cebu Province government,”matod ni Jimenez sa Abril 8.

Nitambong usab sa kalihukan si DA 7 Regional Director Salvador Diputado. (ANV)


Source: Sun.Star Superbalita (https://www.sunstar.com.ph/article/1891104/Superbalita-Cebu/Balita/Sugbusog-sa-tunghaan-gilusad-sa-Kapitolyo?ref=rss&format=simple&link=link)