Naglaom ang mga opisyal sa Dakbayan sa Lapu-Lapu nga mahimong holiday tibuok nasod ang Abril 27.

Mao kini ang adlaw nga saulogon ang ika-500 ka tuig nga kasumaran sa Kadaugan sa Mactan.

Kini aron paghatag og bili sa paghandom sa nabuhat sa bayaning si Lapulapu sa pagdepensa sa isla sa Mactan sa mga kamot sa mga Katsila.

Usa ka resolusyon nga gipangamahanan ni Konsehal Queenie Malingin-Ammann gipasar sa Konseho sa Dakbayan nga naghangyo sa Malacañang sa pagdeklarar sa matag Abril 27 sa matag tuig nga usa ka nasudnong holiday.

Si Amman, chairman sa commitee on tourism, nanghinaot nga mosanong si Presidente Rodrigo Duterte sa ilang hangyo.

Si Lapu-Lapu City Mayor Junard Chan, sa iyang bahin, nibutyag nga human niya napirmahan ang resolusyon, gitagaan dayon niya og kopya si Executive Secretary Salvador Medialdea alang sa pagsanong sa Presidente.

Nanghinaot usab siya nga mosanong ang Presidente sa ilang hangyo sanglit kini laing paagi paghatag og gibug-aton sa kabayanihon ni Lapulapu.

Ang Abril 27 naandan nang holiday sa dakbayan, apan dili sa ubang lugar sa nasod.

“Tua na ni sa Malacañang. So, maghuwat lang ta sa ilang feedback but hopefully ma-declare,” matod ni Chan. (GCM)


Source: Sun.Star Superbalita (https://www.sunstar.com.ph/article/1891103/Superbalita-Cebu/Balita/Lapu-Lapu-mihangyo-sa-Malacaang-Abril-27-i-national-holiday-matag-tuig?ref=rss&format=simple&link=link)