Magpabilin nga requirement ang negative result RT PCR - test sa Covid-19 para sa mga tawo nga gustong mosulod sa dakbayan sa Sugbo.

Kini ang gipahibawo ni Mayor Edgardo Labella human ang Cebu Province ni Gobernador Gwendolyn Garcia nikansela na sa maong requirement para sa mga turista.

“The governor’s (Executive Order) EO can be her prerogative , we respect it. Human ta makigkonsulta sa atong DOH medical expert, mo abide lang gyud ta sa mga testing protocol nga gi provide sa DOH,” padayag ni Labella.

Ang Cebu City maoy adunay labing daghan og kaso sa tanang local government ug lalawigan sa Central Visayas.

Niadtong Pebrero 22, ang Department of Health (DOH)-7 ug Emergency Operation Center nakatala og 185 ka bag-ong kaso sa maong adlaw.

Sa kinatibuk-an, ang dakbayan nga maoy sentro sa patigayon adunay 16,466 ka kaso sa virus diin 3,176 ang aktibo samtang 725 na ang namatay sa maong sakit.

Sa susamang kalambuan, gihatagan og konsiderasyon sa DOH ang pagpalugak sa Probinsiya sa Sugbo sa ilang travel restrictions gikan mga lokal nga turista nga mosud sa probinsiya.

“From our meetings, the governor will allow entrants with medical certificates stating that the said tourist is free from Covid symptoms and health screening like temperature scanning will still be in place and that should the person develop symptoms during his/ her stay, to seek consultation and for isolation, testing and contact tracing,” pasabot ni Loreche. (PAC, WBS)


Source: Sun.Star Superbalita (https://www.sunstar.com.ph/article/1886905/Superbalita-Cebu/Balita/Cebu-City-mangayo-gihapon-og-PCR-test?ref=rss&format=simple&link=link)